ໂຮງຮຽນປະຖົມສຶກສາສົມບູນສາທິດ

ພາລະບົດບາດ 

ໂຮງຮຽນປະຖົມສຶກສາສົມບູນສາທິດຕັ້ງຢູ່ວິທະຍາເຂດດົງໂດກນະຄອນຫຼວງວຽງຈັນເປັນພາກສ່ວນ ທີ່ຂຶ້ນກັບຄະນະສຶກສາສາດ ມະຫາວິທະຍາໄລແຫ່ງຊາດ. ສ່ວນວຽກງານວິຊາການແມ່ນຂຶ້ນກັບຫ້ອງການສຶກສາທິການ ແລະ ກິລາ ເມືອງໄຊທານີ, ໂຮງຮຽນປະຖົມສຶກສາສົມບູນສາທິດ ມີພາລະບົດບາດຈັດການຮຽນ-ການສອນຕາມຫຼັກສູດຂອງກະຊວງສຶກສາທິການ ແລະ ກິລາ ໂດຍເອົາໃຈໃສ່ຕາມ 3 ລັກສະນະ 3 ຂໍ້ ແຂ່ງຂັນ ແລະ 5 ຫຼັກມູນຂອງການສຶກສາໃນລະດັບຊັ້ນປະຖົມພາກບັງຄັບ ເພື່ອພັດທະນາຊັບພະຍາກອນມະນຸດ ທັງເປັນບ່ອນວິໄຈ ແລະ ທົດລອງທາງດ້ານວິຊາຄູ ແລະ ວິທະຍາສາດການສຶກສາຂອງສາຂາຕ່າງໆ. ພາຍໃຕ້ການຊີ້ນໍາຂອງທ່ານຄະນະບໍດີ ຄະນະສຶກສາສາດ ມະຫາວິທະຍາໄລແຫ່ງຊາດ ແລະ ຫົວໝ້າຫ້ອງການສຶກສາທິການ ແລະ ກິລາ ເມືອງໄຊທານີ.

ໜ້າທີ່

• ຈັດຕັ້ງປະຕິບັດແນວທາງນະໂຍບາຍການສຶກສາຂອງພັກ ແລະ ແຜນພັດທະນາຊັບພະຍາກອນມະນຸດຂອງກະຊວງສຶກສາທິການແລະ ກິລາ.
• ສຶກສາອົບຮົມແນວຄິດການເມືອງຂອງພະນັກງານ, ຄູ ແລະ ນັກຮຽນໃຫ້ມີຄຸນສົມບັດສິນທໍາປະຕິວັດ,ມີນໍ້າໃຈຮັກຊາດ, ຮັກລະບອບປະຊາທປະໄຕປະຊາຊົນ ເພື່ອຕອບສະໝອງຄວາມຮຽກຕ້ອງການຂອງພາລະກິດປົກປັກຮັກສາ ແລະ ສ້າງສາປະເທດ.
• ວາງແຜນພັດທະນາ ແລະ ຄຸ້ມຄອງໂຮງຮຽນໃຫ້ມີປະສິດທິພາບ ແລະ ປະສິດທິຜົນ.
• ຈັດຕັ້ງການຮຽນ-ການສອນຕາມຫຼັກສູດທີ່ກະຊວງສຶກສາທິການ ແລະ ກິລາໄດ້ວາງອອກແລະຫຼັກສູດທ້ອງຖິ່ນໃຫ້ສອດຄ່ອງຕາມ 3 ລັກສະນະ 5 ຫຼັກມູນ.
• ບັນຈຸນັກຮຽນເຂົ້າຮຽນຕາມລະບຽບຫຼັກການທີ່ກະຊວງສຶກສາທິການ ແລະ ກິລາໄດ້ກໍານົດໄວ້.
• ຄຸ້ມຄອງ ແລະ ພັດທະນາບຸກຄະລາກອນໃຫ້ມີຄວາມຮູ້ຄວາມສາມາດ ແລະ ທັກສະໃນການຮຽນການສອນ.
• ຂຶ້ນແຜນນໍາໃຊ້ງົບປະມານລາຍຮັບ-ລາຍຈ່າຍ, ສະຫຼຸບລາຍງານປະຈໍາເດືອນ, ພາກຮຽນ ແລະ ປະຈໍາປີ.
• ພັດທະນາ ແລະ ຜະລິດສື່ການຮຽນ-ການສອນໃຫ້ສອດຄ່ອງກັບສະພາບຕົວຈິງ.
• ຈັດຕັ້ງເຝິກອົບຮົມກ່ຽວກັບການຈັດການຮຽນ-ການສອນ, ວິທີສິດສອນໃຫ້ຄູອາຈານ.
• ຈັດຕັ້ງການຮ່ວມໂມງສອນ ແລະ ຖອນຖອດບົດຮຽນ.
• ຕິດຕາມ, ກວດກາ, ປະເມີນການຮຽນ-ການສອນຂອງຄູ.
• ປະຕິບັດນະໂຍບາຍ ແລະ ສະຫັວດດີການ, ຍ້ອງຍໍ ເພື່ອສ້າງກໍາລັງໃຈໃຫ້ແກ່ຄູ ແລະ ນັກຮຽນຕາມລະບຽບ.
• ຊຸກຍູ້ສົ່ງເສີມຄູ-ອາຈານໃນການຄົ້ນຄວ້າວິທະຍາສາດ, ຮີບໂຮມຜົນງານດ້ານວິຊາການຂອງຄູ-ອາຈານເພື່ອຂໍຕໍາແໝ່ງວິຊາການ.
• ສະຫຼຸບ ແລະ ລາຍງານວຽກງານຕ່າງໆຂອງໂຮງຮຽນ ໃຫ້ແກ່ຄະນະສຶກສາສາດ, ຫ້ອງການສຶກສາທິການ ແລະ ກິລາເມືອງ, ເຂດການສຶກສາ, ພະແນກສຶກສາທິການ ແລະ ກິລາແຂວງ, ນະຄອນຫຼວງ.
• ປົກປັກຮັກສາຊັບສົມບັດ ແລະ ສິ່ງແວດລ້ອມຂອງໂຮງຮຽນ.
• ອອກໃບຢັ້ງຢືນ ແລະ ປື້ມຕິດຕາມການຮຽນໃຫ້ແກ່ນັກຮຽນພ້ອມທັງອອກເອກະສານທາງການຕ່າງໆໃຫ້ແກ່ພະນັກງານຄູ ແລະ ນັກຮຽນພາຍໃນໂຮງຮຽນ.
• ປະຕິບັດໝ້າທີ່ອື່ນໆຕາມການມອບໝາຍຂອງຂັ້ນເທິງ.