ພະແນກຄົ້ນຄວ້າວິທະຍາສາດ ແລະ ບໍລິການວິຊາການ

ຂໍ້ກຳນົດ

ໜ້າທີ່ແລະຂອບເຂດສິດຂອງພະແນກຄົ້ນຄວ້າວິທະຍາສາດ

ພະແນກຄົ້ນຄວ້າວິທະຍາສາດມີຫ້ອງການຕັ້ງຢູ່ຫ້ອງ E9 ພະແນກຄົ້ນຄວ້າວິທະຍາສາດປະກອບດ້ວຍ 2 ໜ່ວຍງານ ຄື: ໜ່ວຍງານສົ່ງເສີມແລະຄຸ້ມຄອງການຄົ້ນຄວ້າວິທະຍາສາດ ແລະ ໜ່ວຍງານຄຸ້ມຄອງການບໍລິການວິຊາການ

I. ສະຖິຕິພະນັກງານ, ຄູ-ອາຈານ

ຕາຕະລາງ: ສະຖິຕິລວມພະນັກງານ, ຄູ-ອາຈານແຍກຕາມລະລະດັບວິຊາສະເພາະ

II. ໜ້າທີ່ແລະຂອບເຂດສິດຂອງຫົວໜ້າພະແນກຄົ້ນຄວ້າວິທະຍາສາດ

ພະແນກຄົ້ນຄວ້າວິທະຍາສາດເປັນໜ່ວຍງານການຈັດຕັ້ງໜຶ່ງ ເປັນເສນາທິການຂອງຄະນະສຶກສາສາດ ທີ່ເຮັດບົດບາດສົ່ງເສີມການຄົ້ນຄວ້າວິທະຍາສາດກ່ຽວກັບການຈັດການຮຽນ-ການສອນ, ການປະຕິບັດແຜນພັດທະນາການສຶກສາ (ທັງພາຍໃນແລະພາຍນອກຄະນະສຶກສາສາດ). ພະແນກຄົ້ນຄວ້າວິທະຍາສາດ ຍັງມີບົດບາດສຳຄັນໜຶ່ງຄື: ໃນນາມຄະນະສຶກສາສາດເຮັດບົດບາດການພົວພັນແລະປະຕິບັດການຮ່ວມມືເຮັດການວິໄຈກັບອົງການຈັດຕັ້ງສາກົນ ທັງພາຍໃນແລະຕ່າງປະເທດທີ່ມີການເຊັນສັນຍາຫຼືຄຳຮ້ອງຂໍຄວາມຮ່ວມມື ໂດຍໄດ້ຮັບການອະນຸຍາດແລະເຫັນດີເຫັນພ້ອມຈາກຄະນະບໍດີຄະນະສຶກສາສາດ.

1. ໜ້າທີ່ແລະຂອບເຂດສິດຂອງຫົວໜ້າພະແນກ.

1.1 ສ້າງແຜນການເຄື່ອນໄຫວວຽກງານຄົ້ນຄວ້າວິທະຍາສາດແລະບໍລິການວິຊາການຂອງຄະນະວິຊາໃນແຕ່ລະ ສົກຮຽນໂດຍສົມທົບກັບພາກວິຊາຕ່າງໆເພືອຈັດຕັ້ງປະຕິບັດແຜນການໃຫ້ປາກົດຜົນເປັນຈິງຢ່າງເປັນຂະບວນການມີ ຄຸນນະພາບສູງ.

1.2 ສັງລວມແລະສະເໜີຂໍການພິຈາລະນາຫົວຂໍ້ໃນການຄົ້ນຄວ້າວິທະຍາສາດຂອງອາຈານ.

1.3 ຈັດຕັ້ງກອງປະຊຸມສຳມະນາວິຊາການ ເພື່ອຄັດເລືອກຫົວຂໍ້ຄົ້ນຄວ້າແລະກອງປະຊຸມສຳມະນາເພື່ອຜົນ ສຳເລັດຂອງການຄົ້ນຄວ້າວິທະຍາສາດຂອງອາຈານແລະອອກວາລະສານທາງວິຊາການປະຈຳສົກຮຽນ.

1.4 ຄຸ້ມຄອງການຈັດຕັ້ງປະຕິບັດການຄົ້ນຄວ້າແລະການບໍລິການວິຊາການຕາມຂໍ້ກຳນົດຂອງມະຫາວິທະຍາໄລ ແຫ່ງຊາດ, ວາງລະບຽບການພາຍໃນສຳລັບການຄົ້ນຄວ້າວິທະຍາສາດແລະການບໍລິການວິຊາການຂອງ ຄະນະວິຊາ.

1.5 ຕິດຕໍ່ພົວພັນພາກສ່ວນຕ່າງໆທັງພາຍໃນແລະຕ່າງປະເທດເພື່ອຊອກແຫຼ່ງທຶນເຂົ້າໃນການຄົ້ນຄວ້າ ວິທະຍາສາດ ບໍລິການວິຊາການແລະເຝິກອົບຮົມຕາມຄວາມເໝາະສົມ.

1.6 ສະຫຼຸບສັງລວມ, ປະເມີນບັນດາໂຄງການຄົ້ນຄວ້າວິທະຍາສາດແລະການບໍລິການວິຊາການຂອງອາຈານ ໃນຄະນະສຶກສາສາດປະຈຳພາກຮຽນ, ສົກຮຽນແລ້ວລາຍງານຕໍ່ຄະນະບໍດີ.

1.7 ປະຕິບັດໜ້າທີ່ອື່ນໆຕາມການມອບໝາຍຂອງຄະນະບໍດີ.

2. ໜ້າທີ່ແລະຂອບເຂດສິດຂອງຮອງຫົວໜ້າພະແນກ.

     ຊ່ວຍຫົວໜ້າພະແນກຮັບຜິດຊອບໜ່ວຍວຽກງານຝ່າຍຕ່າງໆຕາມການມອບໝາຍ, ກໍລະນີຫົວໜ້າບໍ່ຢູ່ຮອງຫົວໜ້າພະແນກຜູ້ທີ່ຖືກມອບໝາຍຢ່າງມີລາຍລັກອັກສອນມີສິດບໍລິຫານວຽກງານຂອງພະແນກ.

III. ໂຄງຮ່າງການຈັດຕັ້ງ

    ໂດຍອີງຕາມໜ້າທີ່ແລະຂອບເຂດສິດທີ່ໄດ້ກ່າວມາຂ້າງນັ້ນ, ພະແນກຄົ້ນຄວ້າວິທະຍາສາດສະແດງອອກ ດັ່ງລຸ່ມນີ້:

ກ. ໜ້າທີ່ແລະຂອບເຂດສິດຂອງຫົວໜ້າໜ່ວຍງານສົ່ງເສີມແລະຄຸ້ມຄອງການຄົ້ນຄວ້າວິທະຍາສາດ

   1. ຂຽນໂຄງການວິໄຈແລະແຜນດຳເນີນການວິໄຈ

   2. ສຶກສາແລະກຳນົດໜ້າວຽກລະອຽດໃນການປະຕິບັດແຜນການວິໄຈຢ່າງຊັດເຈນພ້ອມກັບມອບໝາຍ ວຽກງານດັ່ງກ່າວໃຫ້ສະມາຊິກໜ່ວຍງານຮັບຜິດຊອບ.

   3. ບັນທຶກຜົນງານທີ່ສະມາຊິກສາມາດເຮັດໄດ້ສຳເລັດໜ້າທີ່ມອບໝາຍເພື່ອສະເໜີໃນກອງປະຊຸມພະແນກ ຍ້ອງຍໍຊົມເຊີຍຫຼືໃຊ້ເປັນບ່ອນອີງໃນການຄັດເລືອກຕົວເດັ່ນຫຼືຈັດປະເພດພະນັກງານດີເດັ່ນປະຈຳພາກຮຽນຫຼືປະຈຳປີ.

   4. ຮັບປະຕິບັດວຽກງານອື່ນໆທີ່ຮອງຫົວໜ້າພະແນກຫຼືມະຕິຕົກລົງຂອງກອງປະຊຸມພະແນກມອບໝາຍໃຫ້ ຕາມຄວາມຕ້ອງການຂອງວຽກນັ້ນໆ.

   5. ມີໜ້າທີ່ແບ່ງງານໃຫ້ສະມາຊິກໃນໜ່ວຍງານຂອງຕົນຮັບຜິດຊອບປະຕິບັດໜ້າທີ່ວຽກງານທີ່ຖືກມອບໝາຍ ໃຫ້ໜ່ວຍງານຮັບຜິດຊອບ.

ຂ. ໜ້າທີ່ແລະຂອບເຂດສິດຂອງຫົວໜ້າໜ່ວຍງານຄຸ້ມຄອງການບໍລິການວິຊາການ.

   1. ສ້າງແຜນເຜີຍແຜ່ຜົນງານວິໄຈໃຫ້ແກ່ພາກສ່ວນທີ່ກ່ຽວຂ້ອງ (ຂຶ້ນງົບປະມານ, ເຊີນຜູ້ເຂົ້າຮ່ວມ, ກຳນົດເວລາການຈັດຕັ້ງເຜີຍແຜ່, ປະສານກັບບຸກຄົນທີ່ກ່ຽວຂ້ອງ (ທີມງານວິໄຈ) ແລະວຽກງານອື່ນໆທີ່ກ່ຍວຂ້ອງກັບກອງປະຊຸມເຜີຍແຜ່).

   2. ຮັບແລະຕອບຈົດໝາຍ, ສຶກສາແລະຮ່າງລະບຽບການຫຼືຂໍ້ກຳນົດຕ່າງໆທີ່ກ່ຽວກັບການພົວພັນກັບອົງການ ຈັດຕັ້ງທັງພາຍໃນແລະຕ່າງປະເທດທີ່ມີການຮ່ວມມືເຮັດການວິໄຈກັບພະແນກ.

   3. ຄົ້ນຄວ້າເອກະສານກ່ຽວກັບການຂໍຕຳແໜ່ງວິຊາການຂອງຄູ-ອາຈານ, ສຶກສາຂໍ້ມູນຂອງອາຈານທີ່ຂໍ ຕຳແໜ່ງວິຊາການ.

   4. ບໍລິການກອງປະຊຸມຂອງຄະນະກຳມະການຄັດເລືອກຕຳແໜ່ງວິຊາການຂັ້ນຄະນະສຶກສາສາດພ້ອມກັບຈັດ ລະບຽບການຮັກສາເອກະສານຂໍຕຳແໜ່ງວິຊາການ ເພື່ອສົ່ງໃຫ້ກອງປະຊຸມຄັດເລືອກຕຳແໜ່ງວິຊາການຂັ້ນມະຫາ ວິທະຍາໄລ.

   5. ມີໜ້າທີ່ແບ່ງງານທີ່ສະມາຊິກໃນໜ່ວຍງານຂອງຕົນຮັບຜິດຊອບປະຕິບັດໜ້າທີ່ວຽກງານທີ່ໜ່ວຍງານຮັບ ຜິດຊອບ.